काठमाडौँ। भोटेकोशी बाढीपछि नेपाली सेनाका उद्धारकर्मीले ज्यानको जोखिम मोलेर खोज तथा उद्धार कार्यलाई निरन्तरता दिएका छन्। बाढीले रसुवा, नुवाकोट, धादिङ, चितवन तथा नवलपरासीका विभिन्न क्षेत्रमा ठूलो क्षति पुर्याएपछि सेना, नेपाल प्रहरी र सशस्त्र प्रहरीका टोली परिचालन भएका हुन्।
बाढीपछि जलविद्युत् आयोजनाका सुरुङमा फसेका व्यक्तिको खोजी गर्नु उद्धार टोलीका लागि सबैभन्दा चुनौतीपूर्ण बनेको थियो। सुरुङमा लेदो र गेग्रान भरिँदा पानी निकालेर बाटो खुलाएपछि मात्र टोली प्रवेश गर्न सकेको थियो। अँध्यारो र दुर्गन्धित सुरुङमा टर्च तथा वाकी–टकीको सहायताले खोजी गरिएको थियो।
जोखिमका बीच नेपाली सेनाले लाङटाङ, चिलिमे, माथिल्लो त्रिशूली–१ र त्रिशूली–३ ‘ए’ जलविद्युत् आयोजनामा खोज तथा उद्धार गरेको जनाएको छ। माथिल्लो त्रिशूली–१ बाट एक चिनियाँ नागरिकसहित त्रिशूली–३ ‘ए’ बाट दुई कर्मचारीलाई जीवितै उद्धार गरिएको थियो।
सेनाका अनुसार हवाई साधनमार्फत हालसम्म ४ हजार २४२ जनाको उद्धार गरिएको छ। बाढी प्रभावित क्षेत्रमा ८ हजार २०० भन्दा बढी सैनिक प्रत्यक्ष रूपमा परिचालन गरिएको सेनाले जनाएको छ। बेपत्ता व्यक्तिको खोजी कार्य भने अझै जारी छ।
प्रतिक्रिया