काठमाडौं ।काठमाडौं उपत्यकाकै सुन्दर, धार्मिक तथा पर्यटकीय पहिचान बोकेको बुढानीलकण्ठ नगरपालिकाले आगामी आर्थिक वर्ष २०८३/८४ का लागि ३ अर्ब ४५ करोड रुपैयाँ बराबरको बजेट सार्वजनिक गरेको छ।
नगरलाई “स्वच्छ, शान्त, समृद्ध र पर्यटकीय नगर बुढानीलकण्ठ” बनाउने दीर्घकालीन लक्ष्यसहित ल्याइएको बजेटले स्वास्थ्य, शिक्षा, दिगो पूर्वाधार, पर्यटन प्रवद्र्धन, वातावरण संरक्षण, सूचना प्रविधि, सुशासन र सामाजिक विकासलाई मुख्य प्राथमिकतामा राखेको छ।
नगर उपप्रमुख अनिता लामाले प्रस्तुत गरेको बजेटले आर्थिक तथा सामाजिक विकासमार्फत समृद्ध नगर निर्माण गर्ने, सुशासन र सामाजिक न्यायको प्रत्याभूति गर्ने तथा नगरबासीलाई गुणस्तरीय सेवा उपलब्ध गराउने लक्ष्य लिएको छ।
नगर गौरवका आयोजना, ठूला पूर्वाधार र छिटो प्रतिफल दिने योजनामा जोड
बुढानीलकण्ठ नगरपालिकाले विगतमा देखिएको स्रोत छर्ने प्रवृत्तिलाई सुधार गर्दै आगामी बजेटमा ठूला, प्रभावकारी र बहुसंख्यक नगरबासी लाभान्वित हुने आयोजना तथा कार्यक्रमलाई प्राथमिकता दिएको छ।
नगर गौरव, बहुवर्षीय तथा क्रमागत आयोजनाको प्रभावकारी कार्यान्वयनका लागि मात्रै ३१ करोड ३० लाख रुपैयाँ विनियोजन गरिएको छ।
नगरपालिकाले आगामी आर्थिक वर्षदेखि आयोजना कार्यान्वयन प्रणालीलाई थप प्रभावकारी बनाउँदै पहिलो चौमासिकभित्रै ठेक्का प्रक्रिया अघि बढाउने, नियमित अनुगमन गर्ने र ढिलासुस्ती गर्ने निर्माण व्यवसायीलाई जिम्मेवार बनाउने नीति लिएको छ।
स्वास्थ्य क्षेत्रमा १४ करोड २५ लाख : नगर अस्पताललाई विशेष प्राथमिकता
नगरबासीलाई सहज र गुणस्तरीय स्वास्थ्य सेवा उपलब्ध गराउने उद्देश्यले स्वास्थ्य क्षेत्रमा ठूलो लगानी गरिएको छ।
नगरपालिकाले:
स्वास्थ्य सुधार कार्यक्रमका लागि १ करोड ७५ लाख रुपैयाँ
नगर अस्पताल सञ्चालन तथा सुदृढीकरणका लागि १२ करोड ५० लाख रुपैयाँ
सहित समग्र स्वास्थ्य क्षेत्रमा १४ करोड २५ लाख रुपैयाँ विनियोजन गरेको छ।
शिक्षा सुधारमा ९ करोड : संस्थागत विद्यालयसँग साझेदारी र छात्रवृत्ति विस्तार
गुणस्तरीय शिक्षा विकासलाई प्राथमिकतामा राख्दै शिक्षा क्षेत्रमा ९ करोड रुपैयाँ बजेट विनियोजन गरिएको छ।
नगरपालिकाले संस्थागत विद्यालयसँगको साझेदारी कार्यक्रम तथा छात्रवृत्ति कार्यक्रमलाई प्रभावकारी रुपमा कार्यान्वयन गर्ने जनाएको छ।
सामाजिक विकासमा २६ करोड ७५ लाख
नगरको समावेशी विकास, सामाजिक सुरक्षा, महिला, बालबालिका तथा लक्षित वर्गको उत्थानलाई ध्यान दिँदै सामाजिक विकास क्षेत्रमा २६ करोड ७५ लाख रुपैयाँ विनियोजन गरिएको छ।
पर्यटन र उद्योग विकासमा जोड : १ करोड २५ लाख बजेट
धार्मिक तथा प्राकृतिक पर्यटनको ठूलो सम्भावना बोकेको बुढानीलकण्ठलाई पर्यटकीय गन्तव्यका रूपमा विकास गर्ने लक्ष्यसहित उद्योग तथा पर्यटन क्षेत्रमा १ करोड २५ लाख रुपैयाँ बजेट छुट्याइएको छ।
बुढानीलकण्ठ मन्दिर, शिवपुरी क्षेत्र, प्राकृतिक सम्पदा तथा धार्मिक पर्यटनसँग जोडिएका क्षेत्रलाई थप व्यवस्थित गर्दै नगरको पर्यटन पहिचान विस्तार गर्ने लक्ष्य बजेटले लिएको छ।
आर्थिक विकासतर्फ ७ करोड ७७ लाख
स्थानीय उत्पादन, उद्यमशीलता, स्वरोजगार, सहकारी, कृषि तथा आर्थिक गतिविधि विस्तारका लागि आर्थिक विकास क्षेत्रमा ७ करोड ७७ लाख रुपैयाँ विनियोजन गरिएको छ।
‘उज्यालो नगर’ अभियानदेखि विपद् व्यवस्थापनसम्म
नगरपालिकाले नागरिक सुरक्षालाई ध्यान दिँदै:
उज्यालो नगर कार्यक्रम : २ करोड ५० लाख
विपद् व्यवस्थापन तथा महामारी नियन्त्रण कोष : ५० लाख
समग्र विपद् व्यवस्थापन : १ करोड रुपैयाँ विनियोजन गरेको छ।
सुशासन र डिजिटल नगर निर्माणमा ६१ करोड २२ लाख
प्रशासनिक सुधार, संस्थागत क्षमता विकास र सूचना प्रविधिको प्रयोगलाई प्राथमिकता दिँदै सुशासन तथा संस्थागत विकास क्षेत्रमा उल्लेख्य बजेट छुट्याइएको छ।
जसअनुसार:
प्रशासनिक कार्य सञ्चालन : ५६ करोड ७० लाख
जनशक्ति व्यवस्थापन : २ करोड
सूचना प्रविधि तथा सञ्चार : २ करोड ५२ लाख गरी जम्मा ६१ करोड २२ लाख रुपैयाँ विनियोजन गरिएको छ।
खानेपानी, वातावरण र सार्वजनिक सम्पदा संरक्षणमा विशेष ध्यान
बजेटले खानेपानी स्रोत संरक्षण, वन तथा वातावरण संरक्षण, फोहोरमैला व्यवस्थापन, सार्वजनिक जग्गाको संरक्षण तथा विपद् व्यवस्थापनलाई पनि प्राथमिकतामा राखेको छ।
नगरपालिकाले वातावरणमैत्री, व्यवस्थित र दीगो विकासको अवधारणालाई आत्मसात गर्दै सफा र हरियाली नगर निर्माण गर्ने लक्ष्य अघि सारेको छ।
बजेट कार्यान्वयनमा कडाइ : समयमै काम नगरे कारबाही
नगरपालिकाले बजेट कार्यान्वयनलाई प्रभावकारी बनाउन विभिन्न सुधारका नीति अघि सारेको छ।
अब:
आयोजना कार्यान्वयन कार्ययोजना साउनमै तयार गरिने
ठूला आयोजनाको ठेक्का पहिलो चौमासिकमै व्यवस्थापन गरिने
आयोजना अनुगमनलाई परिणाममुखी बनाइने
निर्माण व्यवसायीको कार्यप्रगतिमा कडाइ गरिने
साना आयोजनालाई अर्को वर्ष सार्ने प्रवृत्ति अन्त्य गरिने नगरपालिकाले जनाएको छ।
सडक, ढल, खानेपानी, विद्यालय, स्वास्थ्य संस्था लगायतका पूर्वाधारलाई आवश्यकताको आधारमा छनोट गरी बहुसंख्यक नगरबासी लाभान्वित हुने गरी कार्यान्वयन गर्ने नीति लिइएको छ।
‘आहा बुढानीलकण्ठ’ निर्माणको लक्ष्य
आर्थिक तथा सामाजिक विकासमार्फत समृद्धि हासिल गर्दै सुशासन र सामाजिक न्याय सुनिश्चित गर्ने उद्देश्यसहित ल्याइएको बजेटले अन्ततः “आहा बुढानीलकण्ठ — स्वच्छ, शान्त, समृद्ध र पर्यटकीय नगर” निर्माण गर्ने लक्ष्य बोकेको छ।
नगर नेतृत्वले बजेट कार्यान्वयनमा जनप्रतिनिधि, कर्मचारी, निजी क्षेत्र, नागरिक समाज र नगरबासीबाट रचनात्मक सहयोग प्राप्त हुने विश्वास व्यक्त गरेको छ।
