काठमाडौँ । चालु आर्थिक वर्ष २०८३/८४ को पहिलो दुई महिनामा सरकारको राजस्व संकलन १६.३ प्रतिशतले बढे पनि कुल खर्च आम्दानीभन्दा बढी भएको छ।
महालेखा नियन्त्रक कार्यालयका अनुसार साउन र भदौमा सरकारको कुल खर्च १ खर्ब ९९ अर्ब ८३ करोड ७२ लाख रुपैयाँ पुगेको छ भने कुल प्राप्ति १ खर्ब ९० अर्ब १० करोड ७९ लाख रुपैयाँ रहेको छ। यससँगै खर्च आम्दानीभन्दा ९ अर्ब ७२ करोड ९३ लाख रुपैयाँ बढी भएको हो।
यस अवधिमा राजस्व संकलन १ खर्ब ८३ अर्ब २१ करोड रुपैयाँ पुगेको छ। गत वर्षको सोही अवधिमा १ खर्ब ५७ अर्ब ५३ करोड रुपैयाँ संकलन भएको थियो।
तर विकास खर्च भने सुस्त छ। दुई महिनामा पुँजीगत बजेटतर्फ ७ अर्ब ६६ करोड ४८ लाख रुपैयाँ मात्र खर्च भएको छ, जुन वार्षिक विनियोजनको १.७८ प्रतिशत हो। चालु खर्च १ खर्ब २२ अर्ब ४ करोड र वित्तीय व्यवस्थातर्फ ७० अर्ब १४ करोड रुपैयाँ खर्च भएको छ।
राजस्व संकलनमा सुधार देखिए पनि पुँजीगत खर्चको न्यून प्रगतिका कारण बजेट कार्यान्वयन सरकारका लागि मुख्य चुनौती बनेको छ।
प्रतिक्रिया