काठमाडौं । गृहमन्त्री सुधन गुरुङले पत्रकारहरूविरुद्ध दिएको धम्कीपूर्ण अभिव्यक्तिप्रति मानव अधिकारकर्मी, वरिष्ठ कानुन व्यवसायी तथा नागरिक अभियन्ताहरूले कडा आपत्ति जनाएका छन्।
राष्ट्रिय मानव अधिकार आयोगका पूर्वआयुक्त सुशील प्याकुरेलसहित अधिकारकर्मीहरूले संयुक्त वक्तव्य जारी गर्दै गृहमन्त्री गुरुङलाई आपत्तिजनक शब्द फिर्ता लिई सार्वजनिक रूपमा माफी माग्न आग्रह गरेका छन्।
उनीहरूले गृहमन्त्रीको अभिव्यक्तिले पदको मर्यादा, संयम र गाम्भीर्यमा प्रश्न उठाएको बताएका छन्। पत्रकारको प्रमुख दायित्व राज्यका जिम्मेवार व्यक्तिलाई प्रश्न गर्दै जवाफदेही बनाउनु रहेको उल्लेख गर्दै उनीहरूले धम्कीबाट पत्रकारहरू हतोत्साही नहुने स्पष्ट पारेका छन्।
सञ्चारजगत्ले विगतमा विभिन्न राजनीतिक तथा सामाजिक चुनौतीबीच निर्वाह गरेको भूमिकाको स्मरण गराउँदै अधिकारकर्मीहरूले आचारसंहिताको सीमाभित्र रहेर जिम्मेवारीपूर्वक समाचार सम्प्रेषण गर्न सञ्चारकर्मीहरूलाई आग्रह गरेका छन्।
साथै, गृहमन्त्री गुरुङलाई आफ्नो अभिव्यक्ति तत्काल फिर्ता लिएर सार्वजनिक रूपमा माफी माग्न उनीहरूले पुनः आग्रह गरेका छन्।
गृहमन्त्रीले पत्रकार विरूद्ध बोलेको शब्द फिर्ता लिनुपर्छ, माफी माग्नुपर्छ।
गृहमन्त्री सुधन गुरूङले मिति २०८३ भदौ २३ मा दिएको समग्रमा आपत्तिजनक छ । उक्त अभिव्यक्तिमध्ये पत्रकारविरूद्ध प्रयोग गरेको धम्कीपूर्ण शब्दप्रति हामी खेद व्यक्त गर्दछौँ।
देशमा शान्ति सुरक्षा तथा अमनचयन कायम गर्ने प्रमुख जिम्मेवारीमा रहेका र विपद् व्यवस्थापनको अभिभारा बोकेका गृहमन्त्री गुरुङका अराजक शैली र वचनले बेलाबखत मुलुकको शासनप्रणालीको वजन नै घटाएको हामीले अनुभूति गरेका छौँ। गृहमन्त्री चयन तथा उनीमाथि लागेका आरोपमा गरिएको ‘अनुसन्धान’ हामीले शंकाको घेराभित्रै राखेको सन्दर्भमा आम पत्रकारमाथिको गुरुङको आक्रामक टिप्पणीले उनले आफू जिम्मेवारीमा रहेको पद र ओहोदाको मर्यादा, संयम, र गाम्भीर्य नबुझेको हाम्रो अनुभूति छ ।
अन्योल, त्रासदी र हिंसाको बेलामा सञ्चारकर्मीको तर्कपूर्ण र साहसिक प्रस्तुतिले समाजलाई स्थिर राख्न सघाएको छ । पञ्चायत विरोधी आन्दोलन होस्, द्वन्द्वकालको समाचार र विचार सम्प्रेषण, नारायणहिटी दरबार हत्याकाण्डको सेरोफेरोको अन्योल, ज्ञानेन्द्र शाहको ‘असोजतन्त्र’ लाई जवाफ दिनेदेखि संविधान लेखनका राजनैतिक चुनौतीमाझ गम्भीर विचार सम्प्रेषणसम्म नेपालको सञ्चारजगतले जिम्मेवारपूर्ण भूमिका निर्वाह गरेको छ।
हस्ताक्षरकर्ताहरू :
प्रतिक्रिया