👁️🔎 प्रशासनपोस्टको आँखामा :प्रधानमन्त्रीज्यू, मुख्यसचिवज्यू, मन्त्री र सचिवज्यू !

काठमाडौं । केही दिनअघि सुनसरी र सिराहामा देखिएको मधेश संकटले राज्य संयन्त्रको तयारी र सेवा प्रवाहमाथि गम्भीर प्रश्न उठायो। त्यो संकट तत्कालका लागि नियन्त्रणमा आए पनि देशभरि देखिएका अन्य संकटहरू भने झन् गहिरिँदै गएका छन्। नागरिकले राहतभन्दा सास्ती बढी भोगिरहेका छन्।

आज सर्वसाधारणको दैनिकी अनेक समस्याले गाँजिएको छ। अत्यावश्यक सेवा लिन सरकारी कार्यालय पुग्ने नागरिक घण्टौँ लाइनमा उभिन बाध्य छन्। राष्ट्रिय परिचयपत्र प्रणालीको सर्वर पटक–पटक अवरुद्ध हुँदा बैंकदेखि सामाजिक सुरक्षा र अन्य सरकारी सेवा प्रभावित भएका छन्। राहदानी लिन महिनौँ कुर्नुपर्ने अवस्था छ।

उता ग्यास अभावले धेरै परिवारको चुल्हो निभ्ने अवस्था सिर्जना भएको छ। काठमाडौं उपत्यकामा खानेपानीको संकट उस्तै छ। महँगीले दैनिक उपभोग्य वस्तुको मूल्य आकाशिँदा मध्यम तथा न्यून आय भएका परिवारको भान्सा चलाउनै कठिन भएको छ।

सुकुम्बासी समस्या वर्षौँदेखि समाधानको प्रतीक्षामा छ। स्वास्थ्य र शिक्षाजस्ता आधारभूत क्षेत्रमा विकृति र अनियमितता रोक्ने प्रभावकारी अनुगमन देखिँदैन। रोजगारी सिर्जनामा अपेक्षित प्रगति नहुँदा युवाको विदेश पलायन झन् तीव्र बनेको छ।

सरकारका उच्च पदाधिकारीहरू बैठक, उद्घाटन र भाषणमा व्यस्त देखिन्छन्। तर नागरिकले खोजेको कुरा भने एउटै हो—समयमै सेवा, प्रभावकारी व्यवस्थापन र समस्या समाधान।

राज्यको सफलता भाषणले होइन, नागरिकको दैनिक जीवन सहज बनाउने कामले मापन हुन्छ। त्यसैले अब प्रधानमन्त्री, मुख्यसचिव, मन्त्री र सचिवहरूले प्रशासनिक संयन्त्रलाई थप सक्रिय, उत्तरदायी र परिणाममुखी बनाउँदै देखिएका यी समस्याको तत्काल समाधानमा केन्द्रित हुनु आवश्यक छ।