देशका विभिन्न स्थानबाट लागूऔषधसहित २६ जना पक्राउ

काठमाडौँ । नेपाल प्रहरीले देशका विभिन्न जिल्लाबाट लागूऔषधसहित २६ जनालाई पक्राउ गरेको छ। केन्द्रीय प्रहरी समाचारकक्षका अनुसार काठमाडौँ, मोरङ, सुर्खेत, सल्ल्यान, बर्दिया, चितवन, सर्लाही, नवलपरासी पश्चिम, भक्तपुर, रुकुम पश्चिम तथा बझाङ लगायतका स्थानमा गरिएको कारबाहीमा ट्रामाडोल, डाइजेपाम, फेनारगन, बुप्रेनोर्फिन, ब्राउनसुगर, खैरो हेरोइन र गाँजा बरामद गरिएको हो।

प्रहरीले काठमाडौँको कालधारा र नयाँबस्तीबाट चार, बझाङबाट दुई, सुर्खेतबाट तीन, सल्ल्यानबाट एक तथा मोरङका विभिन्न स्थानबाट आठ जनालाई पक्राउ गरेको जनाएको छ। त्यस्तै नवलपरासी पश्चिम, भक्तपुर, बर्दिया, रुकुम पश्चिम, चितवन र सर्लाहीबाट थप व्यक्तिहरू पक्राउ परेका छन्।

कारबाहीका क्रममा विभिन्न परिमाणमा लागूऔषध, डिजिटल तराजु तथा नगदसमेत बरामद गरिएको प्रहरीले जनाएको छ। पक्राउ परेकामाथि सम्बन्धित प्रहरी कार्यालयबाट थप अनुसन्धान भइरहेको छ।