कागेश्वरी मनोहरा नगरपालिका र जापानको ओत्सुकी शहरबिच भगिनी सम्बन्ध बिस्तार

प्रशासन पोस्ट
२०८१ भाद्र २०, बिहीबार १३:५९

काठमाडौँ । कागेश्वरी मनोहरा नगरपालिका र जापानको ओत्सुकी शहरबीच भगिनी सम्बन्धका लागि सम्झौता पत्रमा हस्ताक्षर भएको छ । बुधवार काठमाडौँमा एक कार्यक्रमबिच कागेश्वरी मनोहरा नगरपालिका नगर प्रमुख उपेन्द्र कार्की र जापानको ओत्सुकी शहरको प्रान्तीय सभाका सभापति उजुकी मासाइतोले समझदारी पत्रमा हस्ताक्षर गरेका हुन् ।

सम्झौता पत्रमा हस्ताक्षर पश्चात् कुरा गर्दै नगर प्रमुख कार्कीले जापानको ओत्सुकी सहरसँग कला, संस्कृति, खेलकुद, पर्यटन र कृषिको माध्यमबाट मैत्रीपूर्ण सम्बन्ध विकास गर्ने समझदारी भएको बताए । उनले जापानको ओत्सुकी शहर र कागेश्वरी मनोहरा नगरपालिकाबीच आपसी सहयोग आदानप्रदान र प्रवर्द्धनका लागि फ्रेण्डसिप सिटी एक्सचेन्जका लागि दुई शहरबिच भगिनी सम्बन्ध कायम गरिएको बताए । मेयर कार्कीले दुई सहरका बीचमा पारस्परिक सम्मान, आपसी राजनीतिक विश्वास, समानता र पारस्परिक लाभको सिद्धान्तलाई कायम राख्दै दुवै पक्षले मैत्रीपूर्ण रूपमा सहयोग आदानप्रदान गरिने बताए ।

उनले अर्थतन्त्र, संस्कृति, कृषि, पशुपालन र पर्यटन लगायतका क्षेत्रमा विभिन्न सहयोग आदानप्रदान पनि हुने उल्लेख गरे । नेपालको तुलनामा जापान पूर्वाधार र प्रविधिको विकासमा निकै अघि रहेकाले त्यहाँको असल अभ्यासहरूलाई नगरपालिकाले अनुसरण गर्ने बताए । सम्झौता पत्रमा हस्ताक्षर पश्चात् जापानका उच्च अधिकारीहरूले पनि नेपालको सहरसँग भगिनी सम्बन्ध स्थापित गर्न पाएकोमा खुसी व्यक्त गरेका थिए ।

२०८१ भाद्र २०, बिहीबार १३:५९ प्रकाशित

तपाईको प्रतिक्रिया दिनुहोस्

↗

ट्रेन्डिङ समाचार