कालिन्चोक इन्भेष्टमेन्टको आम्दानी १ करोड ४० लाख, ‘आईआरएन बी’ रेटिङ यथावत्

काठमाडौं । कालिन्चोक इन्भेष्टमेन्ट कम्पनी लिमिटेडले सन् २०२६ मा १ करोड ४० लाख रुपैयाँ आम्दानी गरेको छ। अघिल्लो दुई वर्षमा १०–१० लाख रुपैयाँ आम्दानी गरेको कम्पनीको कमाई एक वर्षमै उल्लेख्य बढेको हो।

नेपाल धितोपत्र बोर्डबाट आईपीओ निष्कासनको अनुमति पर्खिरहेको कम्पनीले २४ करोड रुपैयाँ बराबरको २४ लाख कित्ता साधारण सेयर निष्कासन गर्ने तयारी गरेको छ।

कम्पनीको आम्दानी मुख्यतः बैंक तथा वित्तीय संस्थामा राखिएको निक्षेपको ब्याज र अचल सम्पत्ति बिक्रीबाट भएको आम्दानीमा आधारित छ। कम्पनीले पर्यटन, ऊर्जा, केबलकार, आतिथ्य तथा उत्पादनमूलक क्षेत्रमा लगानी विस्तार गरिरहेको छ।

कम्पनीका प्रमुख प्रवर्द्धक कालिन्चोक दर्शन लिमिटेडको करिब ३८ प्रतिशत, ट्रस्ट इक्विटी फन्ड लिमिटेडको करिब ७ प्रतिशत र बाँकी सेयर अन्य प्रवर्द्धकको स्वामित्वमा रहेको छ। कम्पनीको सञ्चालक समितिको अध्यक्ष बालकृष्ण शिवाकोटी हुन्।

सन् २०२६ जुलाई मध्यसम्म कम्पनीले बैंक तथा वित्तीय संस्थाबाट कुनै ऋण लिएको छैन। प्रवर्द्धकको इक्विटी पुँजीमा आधारित ऋणरहित संरचनाले वित्तीय दायित्वको जोखिम कम गरेको कम्पनीको दाबी छ।

तर, कम्पनीका अधिकांश लगानी सूचीकृत नभएका इक्विटी सेयर तथा निर्माणाधीन परियोजनामा केन्द्रित छन्। ती लगानी तत्काल नगदमा परिणत गर्न कठिन हुने भएकाले तरलता र प्रतिफल कम्पनीका लागि चुनौतीका रूपमा देखिएका छन्।

यसैबीच, इन्फोमेरिक्स क्रेडिट रेटिङ नेपाल लिमिटेडले कालिन्चोक इन्भेष्टमेन्टको इश्युअर रेटिङ ‘आईआरएन बी’ यथावत् राखेको छ। उक्त रेटिङले कम्पनीमा वित्तीय दायित्व समयमै भुक्तानी गर्न नसक्ने जोखिम उच्च रहेको संकेत गर्छ।

अनुभवी प्रवर्द्धक, ऋणरहित पुँजी संरचना, औपचारिक लगानी नीति र सक्रिय जोखिम व्यवस्थापनलाई सकारात्मक पक्षका रूपमा लिइए पनि कम्पनीको छोटो सञ्चालन इतिहास र अधिकांश परियोजना विकासकै चरणमा रहेकाले रेटिङमा दबाब कायम रहेको इन्फोमेरिक्स नेपालले जनाएको छ।