अर्थमन्त्री वाग्ले अमेरिकामा, पुनर्निर्माण र लगानीबारे उच्चस्तरीय छलफल

काठमाडौं । अर्थमन्त्री डा. स्वर्णिम वाग्ले दुई सदस्यीय प्रतिनिधिमण्डलको नेतृत्व गर्दै अमेरिका पुगेका छन्। वासिङ्टन डीसी पुगेका वाग्लेलाई नेपाली दूतावासका अधिकारीहरूले स्वागत गरेका छन्।

दुईदिने अमेरिका भ्रमणका क्रममा अर्थमन्त्री वाग्लेले अमेरिकी अर्थमन्त्री स्कट बेसेन्ट र विश्व बैंक समूहका अध्यक्ष अजय बङ्गासँग छुट्टाछुट्टै भेटवार्ता गर्ने कार्यक्रम छ। भेटमा नेपाल–अमेरिका आर्थिक सहकार्य, विश्व बैंकको सहयोग, भोटेकोशी बाढीपछिको पुनर्निर्माण, सहुलियतपूर्ण वित्तीय स्रोत, वित्तीय क्षेत्र सुधार तथा सम्पत्ति शुद्धीकरणसम्बन्धी अन्तर्राष्ट्रिय निगरानी सूचीबाट बाहिरिने विषयमा छलफल हुनेछ।

भोटेकोशी बाढीबाट क्षतिग्रस्त सडक, पुल, विद्युत् प्रसारण लाइनलगायत पूर्वाधार पुनर्निर्माणका लागि थप स्रोत जुटाउने विषयलाई नेपालले प्राथमिकतामा राखेको छ। विपद् प्रतिरोधी पूर्वाधार निर्माणका लागि आवश्यक वित्तीय स्रोत परिचालनबारे पनि छलफल हुने अर्थ मन्त्रालयले जनाएको छ।

विश्व बैंकसँगको वार्तामा नेपालले नयाँ प्रतिबद्धताभन्दा उपलब्ध सहुलियतपूर्ण वित्तीय स्रोतलाई प्रभावकारी रूपमा परिचालन गर्ने वातावरण बनाउन जोड दिने तयारी गरेको छ। आयोजना कार्यान्वयनमा देखिएको ढिलाइ, ठेक्का व्यवस्थापन, जग्गा अधिग्रहण तथा विभिन्न तहबीचको समन्वयका कारण प्रतिबद्ध स्रोत खर्च हुन नसकेको विषय पनि छलफलमा उठ्नेछ।

अर्थमन्त्री वाग्लेले अमेरिकी अन्तर्राष्ट्रिय विकास वित्त निगम (डीएफसी) का अधिकारी तथा अमेरिकी निजी क्षेत्रका लगानीकर्तासँग समेत भेटवार्ता गर्नेछन्। पूर्वाधार, ऊर्जा र निजी क्षेत्रमार्फत अमेरिकी लगानी भित्र्याउने तथा रोजगारी र आर्थिक अवसर विस्तार गर्ने विषयमा पनि छलफल हुने बताइएको छ।