काठमाडौं । संयुक्त राष्ट्रसंघको ८१औँ महासभामा नेपालको प्रतिनिधित्व गर्दै सम्बोधन गरेका प्रधानमन्त्री वालेन्द्र शाह आज स्वदेश फर्कनुहुने भएको छ । प्रधानमन्त्री तथा मन्त्रिपरिषद्को कार्यालय र परराष्ट्र मन्त्रालयको भ्रमण तालिकाअनुसार प्रधानमन्त्री शाह शनिबार अर्थात् सेप्टेम्बर २६ मा काठमाडौं फर्कने कार्यक्रम छ ।
प्रधानमन्त्री शाह न्यूयोर्कबाट कतार हुँदै आज साँझसम्म काठमाडौं आइपुग्ने कार्यक्रम रहेको स्रोतले जनाएको छ । उनीसहितको टोली कतार एयरवेजमार्फत स्वदेश फर्कनेछ ।
प्रधानमन्त्री शाह गत असोज ६ गते संयुक्त राष्ट्रसंघको ८१औँ महासभाको उच्चस्तरीय सप्ताहमा सहभागी हुन न्यूयोर्क प्रस्थान गर्नुभएको थियो । यो उहाँ प्रधानमन्त्री बनेपछि भएको पहिलो औपचारिक विदेश भ्रमणसमेत हो ।
न्यूयोर्कमा रहँदा प्रधानमन्त्री शाहले असोज ८ गते संयुक्त राष्ट्रसंघको महासभालाई सम्बोधन गर्नुभएको थियो । आफ्नो सम्बोधनमा उहाँले नेपालमा हालै भएको विनाशकारी भोटेकोशी–त्रिशूली बाढीबाट भएको मानवीय तथा भौतिक क्षति, जलवायु परिवर्तनका कारण हिमाली मुलुकले भोगिरहेका जोखिम तथा जलवायु न्यायको विषय अन्तर्राष्ट्रिय समुदायसमक्ष उठाउनुभएको थियो ।
प्रधानमन्त्री शाहले बाढीबाट भएको क्षतिलाई नेपालका लागि मात्र नभई विश्वकै लागि चेतावनीका रूपमा प्रस्तुत गर्दै जलवायु परिवर्तनबाट बढी प्रभावित मुलुकका पक्षमा अन्तर्राष्ट्रिय सहयोग र जलवायु वित्तको आवश्यकता औँल्याउनुभएको थियो । महासभामा उहाँले हिमालय, जलवायु न्याय, जलवायु वित्त तथा विश्वव्यापी व्यवस्थामा सुधारका विषयसमेत उठाउनुभएको थियो ।
महासभालाई सम्बोधन गर्नुअघि प्रधानमन्त्री शाहले संयुक्त राष्ट्रसंघका महासचिव एन्टोनियो गुटेरेससँग पनि भेटवार्ता गर्नुभएको थियो । भेटमा नेपालका समसामयिक विषय तथा अन्तर्राष्ट्रिय चासोका विषयमा छलफल भएको थियो ।
प्रधानमन्त्री शाहको भ्रमण टोलीमा प्रमुख सल्लाहकार कुमार ब्यञ्जनकार, प्रमुख स्वकीय सचिव सुवास शर्मा, निजी सचिव प्रदीप परियारलगायत सहभागी थिए । परराष्ट्र मन्त्रालयले सार्वजनिक गरेको भ्रमणसम्बन्धी विवरणअनुसार प्रधानमन्त्री शाहको नेतृत्वमा उच्चस्तरीय नेपाली प्रतिनिधिमण्डल न्यूयोर्क गएको थियो ।
अब प्रधानमन्त्रीको ध्यान स्वदेशी एजेन्डातर्फ
संयुक्त राष्ट्रसंघको महासभामा नेपालको धारणा अन्तर्राष्ट्रिय समुदायसमक्ष प्रस्तुत गरेर प्रधानमन्त्री शाह स्वदेश फर्किएसँगै सरकारको ध्यान पुनः मुलुकभित्रका तत्कालीन समस्या र प्राथमिकतामा केन्द्रित हुने अपेक्षा गरिएको छ ।
विशेषगरी पछिल्लो समय देशले भोगिरहेको प्राकृतिक विपद्, बाढीपहिरोबाट प्रभावित नागरिकको उद्धार तथा पुनःस्थापना, सार्वजनिक सेवा प्रवाह, बजार व्यवस्थापन, प्रशासनिक सुधार तथा सुशासनका विषय सरकारका तत्कालीन प्राथमिकताका रूपमा रहेका छन् ।
त्यसैगरी संघीय निजामती सेवा विधेयक, कर्मचारी व्यवस्थापन, प्रशासनिक पुनर्संरचना तथा सरकार र प्रशासनबीचको प्रभावकारी समन्वयका विषयमा समेत प्रधानमन्त्रीको स्वदेश फिर्तीपछि थप निर्णय र कार्यान्वयनको अपेक्षा गरिएको छ ।
प्रधानमन्त्री शाहको न्यूयोर्क भ्रमणका क्रममा नेपालको विपद् र जलवायु जोखिमलाई अन्तर्राष्ट्रिय मञ्चमा प्राथमिकताका साथ उठाइएको अवस्थामा अब त्यसलाई स्वदेशी नीति तथा कार्यक्रमसँग कसरी जोडिन्छ भन्ने विषय पनि महत्वपूर्ण हुनेछ ।
प्रतिक्रिया