हेलो सरकारमा गुनासा–उजुरीको बाढी,बालेन प्रधानमन्त्री बनेयता ५४ दिनमै २० हजार बढी गुनासा–उजुरी
७ हजार ७ सयभन्दा बढी उजुरी सम्बोधन, दैनिक ४ सयसम्म गुनासा
काठमाडौं ।प्रधानमन्त्री तथा मन्त्रिपरिषद् कार्यालयअन्तर्गतको ‘हेलो सरकार’ शाखामा प्रधानमन्त्री बालेन्द्र शाह (बालेन) नेतृत्वमा सरकार गठन भएयता गुनासा तथा उजुरीको चाप उल्लेखनीय रूपमा बढेको छ। पछिल्ला ५४ दिनमा मात्रै हेलो सरकार पोर्टलमार्फत २० हजार ८ सय ४२ वटा उजुरी तथा गुनासा दर्ता भएका छन्।
प्रधानमन्त्री बालेनले नागरिकका गुनासा तथा उजुरीमाथि कडाइका साथ कारबाही गर्ने संकेत दिएपछि आम नागरिकमा ‘अब केही हुन्छ’ भन्ने आशा जागेको र त्यसकै प्रभावस्वरूप उजुरी गर्ने क्रम ह्वात्तै बढेको प्रधानमन्त्री कार्यालयका अधिकारीहरू बताउँछन्।
हेलो सरकार शाखाका अनुसार अहिले देशभरबाट दैनिक औसत ३ सयदेखि ४ सयसम्म उजुरी प्राप्त भइरहेका छन्। बढ्दो चापका कारण शाखामा कार्यरत झण्डै एक दर्जन कर्मचारीलाई गुनासा सुन्न, टिपोट गर्न र व्यवस्थापन गर्न समेत भ्याइनभ्याई पर्ने अवस्था रहेको छ।
कार्यालयका अनुसार पोर्टलमार्फत आएका उजुरीबाहेक टेलिफोनमार्फत समेत ठूलो संख्यामा गुनासा आउने गरेका छन्। टेलिफोनबाट प्राप्त उजुरीलाई समेत हेलो सरकार पोर्टलमै अभिलेखीकरण गरी व्यवस्थापन गर्ने गरिएको शाखाले जनाएको छ। कर्मचारीहरूले फोनमार्फत आएका सेवाग्राहीलाई आफ्ना गुनासा पोर्टलमा समेत दर्ता गर्न आग्रह गर्ने गरेका छन्।
हेलो सरकार शाखाका कर्मचारीहरूका अनुसार प्रधानमन्त्री बालेन नियुक्त भएयता हालसम्म ७ हजार ७ सय ५ वटा उजुरी सम्बोधन गरिएको छ भने बाँकी उजुरीमाथि पनि द्रुत रूपमा प्रक्रिया अघि बढाइएको छ।
शाखामा सबैभन्दा बढी वैदेशिक रोजगारीका नाममा ठगीमा परेका नागरिकका उजुरी आउने गरेका छन्। विशेषगरी विभिन्न दलाल र म्यानपावरमार्फत ठगिएको भन्दै पीडितहरूले न्यायको माग गरेका छन्।
त्यसैगरी शिक्षा क्षेत्रमा हुने आर्थिक अनियमितता र ठगीविरुद्ध पनि उल्लेख्य उजुरी परिरहेका छन्। विद्यालयहरूले भर्नाका नाममा चर्को शुल्क असुल्ने, अतिरिक्त शुल्क लिने तथा अभिभावकमाथि आर्थिक भार थोपर्ने गरेको गुनासो बढ्दो क्रममा रहेको हेलो सरकार शाखाले जनाएको छ।
स्वास्थ्य क्षेत्रमा हुने ठगी, सार्वजनिक जग्गा अतिक्रमण, चोरीका घटना वृद्धि, श्रम शोषण, विद्युत् आपूर्तिको समस्या तथा अन्य सामाजिक विकृतिविरुद्ध समेत नागरिकले व्यापक रूपमा उजुरी गरिरहेका छन्। सार्वजनिक सम्पत्ति अतिक्रमण गर्ने तथा भ्रष्टाचारमा संलग्न व्यक्तिमाथि कडा कारबाही गर्नुपर्ने मागसहितका उजुरी उल्लेख्य संख्यामा आएको शाखाले जनाएको छ।
हाल हेलो सरकार शाखाले गुनासा व्यवस्थापनका लागि १० वटा टेलिफोन लाइन सञ्चालनमा ल्याएको छ। साथै सामाजिक सञ्जालका विभिन्न माध्यममार्फत पनि उजुरी संकलन भइरहेको छ।
हेलो सरकार शाखा स्थापना भएयता हालसम्म कुल १ लाख ३ हजार ४ सय ९१ वटा उजुरी दर्ता भएकोमा करिब ६३ प्रतिशत उजुरी मात्रै फर्छ्योट भएको तथ्यांक छ। प्रमाण र आधार नपुगेका झण्डै २५ हजार उजुरी भने अझै प्रक्रियाविहीन अवस्थामा रहेको जनाइएको छ।