हिमाली विपद् सामना गर्न नेपाल–चीन सहकार्य आवश्यक : चिनियाँ राजदूत

काठमाडौँ । नेपालका लागि चिनियाँ राजदूत झाङ माओमिङले हिमाली क्षेत्रमा बढ्दो जलवायुजन्य जोखिम र प्राकृतिक विपद् सामना गर्न नेपाल र चीनबीच सहकार्य आवश्यक रहेको बताएका छन्।

काठमाडौँमा शनिबार आयोजित काष्ठमण्डप संवादमा बोल्दै राजदूत झाङले नेपाल र चीन एउटै हिमाली पारिस्थितिक प्रणालीसँग जोडिएकाले बाढी, पहिरोलगायत विपद्को प्रभाव दुवै देशले सामना गर्नुपर्ने बताए। उनले विपद् पूर्वसूचना प्रणाली, जल तथा मौसम निगरानी, अत्याधुनिक प्रविधि र संयुक्त उद्धार अभ्यासलाई प्राथमिकता दिनुपर्नेमा जोड दिए।

उनका अनुसार गत अगस्ट २६ को बाढी तथा पहिरोपछि चीनले नेपाललाई २४ लाख अमेरिकी डलर नगद सहयोग गर्नुका साथै ड्रोन, बेलीब्रिज, डीएनए परीक्षण उपकरण र उद्धार डुङ्गालगायत सामग्री उपलब्ध गराएको थियो। विपद् व्यवस्थापनमा सहयोग गर्न सुरुङ उद्धार, डीएनए तथा फरेन्सिक पहिचानका २४ जना विज्ञसमेत नेपाल पठाइएको उनले जानकारी दिए।

जलवायु परिवर्तनका कारण हिमाली क्षेत्रमा जोखिम अझ बढ्न सक्ने भन्दै राजदूत झाङले नेपाल–चीनबीच सूचना आदानप्रदान, उद्धार क्षमता, हरित विकास, स्वच्छ ऊर्जा, वातावरण संरक्षण र विपद् प्रतिरोधी पूर्वाधार निर्माणमा सहकार्य विस्तार गर्नुपर्ने बताए।