नेप्से ३१ अंकले बढ्यो, कारोबार ८ अर्ब ५५ करोड

प्रशासन पोस्ट २०८३ कार्तिक १२, बिहिवार १५:२६

काठमाडौं । सेयर बजार परिसूचक नेप्से बिहीबार ३१.५४ अंकले बढेर २६९५ अंकमा पुगेको छ। यो साउन १२ गतेयताकै उच्च विन्दु हो।

बजारमा कारोबार रकमसमेत बढेको छ। बुधबार ७ अर्ब ४५ करोड रुपैयाँको कारोबार भएकोमा बिहीबार ८ अर्ब ५५ करोड रुपैयाँको सेयर किनबेच भयो। यो वैशाख ३ गतेयताकै उच्च कारोबार हो।

आज १८१ कम्पनीको सेयर मूल्य बढ्दा ९१ कम्पनीको घटेको छ भने ६ कम्पनीको मूल्य स्थिर रह्यो। सबै समूहगत सूचक सकारात्मक रहे।

बेनी हाइड्रोपावरको सेयर मूल्य सर्वाधिक १५ प्रतिशत बढ्यो। त्यस्तै, सोपान फर्मास्युटिकल्सको ८.७२ प्रतिशत, नेपाल पुनर्बीमाको ५.६१ प्रतिशत र नेपाल फाइनान्सको ५.४९ प्रतिशतले मूल्य बढ्यो।