भोटेकोशी बाढी : पुनर्निर्माणमा ७ खर्ब २३ अर्ब लाग्ने अनुमान

बाढीबाट सडक, पुल, जलविद्युत् आयोजना, निजी घर, विद्यालय, स्वास्थ्य संस्था, व्यवसाय तथा अन्य पूर्वाधारमा ठूलो क्षति पुगेको छ। पूर्वाधार पुनःउत्थानका लागि मात्रै ४ खर्ब ७३ अर्ब ५७ करोड रुपैयाँभन्दा बढी आवश्यक पर्ने अनुमान छ।

बाढीबाट ७ हजार ५ सय ७० निजी घर, ४८ सार्वजनिक भवन, ७ स्वास्थ्य संस्था र ३० सांस्कृतिक सम्पदा प्रभावित भएका छन्। त्यस्तै, १३ जलविद्युत् आयोजना र पाँच सोलार प्लान्टमा क्षति पुगेको प्रतिवेदनमा उल्लेख छ।

शिक्षातर्फ १८ विद्यालय प्रभावित भएका छन्। तीमध्ये ११ विद्यालय भवन पूर्णरूपमा क्षतिग्रस्त र ७ वटामा आंशिक क्षति पुगेको छ। विद्यालय संरचना पुनर्निर्माण तथा शैक्षिक गतिविधि सञ्चालनका लागि २ अर्ब ३४ करोड रुपैयाँभन्दा बढी आवश्यक पर्ने अनुमान गरिएको छ। बाढीका कारण ९ हजारभन्दा बढी विद्यार्थीको पठनपाठन प्रभावित भएको छ।

हालसम्म करिब १४ अर्ब रुपैयाँ सहयोग संकलन भए पनि पुनर्निर्माणका लागि अझै ७ खर्ब रुपैयाँभन्दा बढी रकम अपुग रहेको प्राधिकरणले जनाएको छ। सरकारले विश्व बैंक, एसियाली विकास बैंकलगायत दातृ निकायसँग सहयोगका लागि आग्रह गरेको छ।