काठमाडौं । यसपटक नायब सुब्बा (नासु) पदमा लोक सेवा आयोगमार्फत नयाँ भर्नाका लागि विज्ञापन खुल्ने सम्भावना निकै न्यून देखिएको छ। सामान्य प्रशासन मन्त्रालयले रिक्त नायब सुब्बा पदमा नयाँ कर्मचारी माग गर्नुअघि फाजिलमा रहेका कर्मचारी व्यवस्थापन गर्न सम्बन्धित निकायहरूलाई निर्देशन दिएपछि नयाँ भर्ना प्रभावित हुने देखिएको हो।
भूमि व्यवस्था, सहकारी , संघीय मामिला तथा सामान्य प्रशासन मन्त्रालयले विभिन्न मन्त्रालय, आयोग, सचिवालय, समिति, कार्यालय तथा निकायलाई पठाएको पत्रमा नायब सुब्बा पदका कर्मचारीको पदपूर्ति व्यवस्थापनसम्बन्धी विषय स्पष्ट पारिएको छ। मन्त्रालयको कर्मचारी व्यवस्थापन शाखाले लोक सेवा आयोगको मागसम्बन्धी व्यवस्था र फाजिल कर्मचारी व्यवस्थापनको विषयलाई जोड्दै सम्बन्धित निकायहरूलाई पत्राचार गरेको हो।
सरकारले विभिन्न निकायको संगठन तथा व्यवस्थापन (ओ एण्ड एम) सर्वेक्षण गर्दा नायब सुब्बाका धेरै पद कटौती भएका थिए। पद कटौती र संगठन संरचना पुनर्संरचनाका कारण ठूलो संख्यामा नायब सुब्बा कर्मचारी फाजिलमा परेका छन्। यसले एकातिर कर्मचारी व्यवस्थापनको चुनौती बढाएको छ भने अर्कोतिर नयाँ कर्मचारी भर्नाको प्रक्रियासमेत प्रभावित हुने अवस्था सिर्जना गरेको छ।
मन्त्रालयको पत्रअनुसार निजामती सेवा नियमावली, २०५० को नियम १३ को उपनियम (३) बमोजिम फाजिलमा रहेका कर्मचारीको अनिवार्य व्यवस्थापन गर्नुपर्ने व्यवस्था स्मरण गराइएको छ। उक्त व्यवस्थाअनुसार फाजिल कर्मचारी व्यवस्थापन नगरी नयाँ पदपूर्तिका लागि माग पठाउन कठिन हुने देखिएको छ।
पत्रमा फाजिल कर्मचारी व्यवस्थापनका लागि सम्बन्धित केन्द्रीय निकायमार्फत यस मन्त्रालयमा कर्मचारी व्यवस्थापनको लिखित फाइल पेस गर्नुपर्ने र फाजिल कर्मचारीमार्फत रिक्त पदपूर्ति हुन नसक्ने अवस्था एकिन भएपछि मात्रै लोक सेवा आयोगमा पदपूर्तिका लागि माग पठाउने व्यवस्था हुनुपर्ने उल्लेख छ।
यस व्यवस्थाले नायब सुब्बाका रिक्त पदहरूमा नयाँ भर्नाभन्दा पहिले फाजिल कर्मचारीलाई समायोजन तथा व्यवस्थापन गर्ने प्रक्रियालाई प्राथमिकता दिएको छ। फलस्वरूप, रिक्त नायब सुब्बा पदमा फाजिल कर्मचारी व्यवस्थापन हुन सक्ने भएकाले यसपटक नयाँ विज्ञापनका लागि उपलब्ध हुने पद संख्या उल्लेख्य रूपमा घट्न सक्ने देखिएको छ।
नयाँ विज्ञापनमा ठूलो संख्यामा पद आउने सम्भावना न्यून
नायब सुब्बा पदमा लोक सेवा आयोगको तयारी गरिरहेका हजारौँ युवाका लागि यो खबर निराशाजनक बन्न सक्ने देखिएको छ। विगतमा नियमित रूपमा खुल्ने नासु पदको विज्ञापन यसपटक निकै सीमित हुन सक्ने वा आवश्यकताअनुसार मात्रै पदपूर्ति हुने सम्भावना देखिएको छ।
फाजिल कर्मचारी व्यवस्थापनपछि पनि रिक्त पद बाँकी रहेमा मात्रै नयाँ भर्नाका लागि माग पठाउन सकिने भएकाले नासु पदमा ठूलो संख्यामा विज्ञापन खुल्ने सम्भावना कमजोर बनेको हो।
यद्यपि, यसले नायब सुब्बामा विज्ञापन नै नखुल्ने भन्ने निश्चित भने गर्दैन। फाजिल कर्मचारी व्यवस्थापनपछि रिक्त पद कायम रहेमा सम्बन्धित निकायले माग पठाउन र लोक सेवा आयोगले पदपूर्तिको प्रक्रिया अघि बढाउन सक्नेछन्।
लोकसेवा तयारी गरिरहेका युवालाई प्रत्यक्ष असर
नायब सुब्बा पदलाई निजामती सेवामा प्रवेश गर्ने महत्वपूर्ण अवसरका रूपमा लिइन्छ। विशेषगरी स्नातक तथा उच्च माध्यमिक तहका विद्यार्थी र लोक सेवा तयारी गरिरहेका युवाका लागि नासु पद आकर्षक मानिन्छ।
तर, संगठन संरचना पुनर्संरचना, पद कटौती र फाजिल कर्मचारी व्यवस्थापनको प्राथमिकताले नयाँ भर्नाको अवसर खुम्चिने संकेत गरेको छ। यसले लोक सेवा तयारी गरिरहेका युवाहरूको प्रतिस्पर्धा र अवसरको अवस्थालाई समेत प्रभावित पार्ने देखिएको छ।
फाजिल कर्मचारी व्यवस्थापनलाई प्राथमिकता दिने सरकारी नीतिका कारण यसपटक नायब सुब्बामा नयाँ भर्नाको ढोका साँघुरिने निश्चित भएको छ । रिक्त पदमा फाजिल कर्मचारी व्यवस्थापनपछि मात्रै नयाँ माग पठाउनुपर्ने व्यवस्थाले नासु पदको लोक सेवा विज्ञापन यस वर्ष सीमित हुने सम्भावना बढाएको छ।
प्रतिक्रिया