काठमाडौं
प्रधानमन्त्री तथा मन्त्रिपरिषद्को कार्यालयले आगामी आर्थिक वर्षको नीति, कार्यक्रम तथा बजेटमा आम नागरिकको सहभागिता गराउने उद्देश्यले ‘सुझाव संकलन पोर्टल’ सञ्चालनमा ल्याएको छ।
आगामी आर्थिक वर्षको नीति तथा कार्यक्रम सोमबार सार्वजनिक हुँदै छ। नीति तथा कार्यक्रममा जनताका आवश्यकता र मौलिक अपेक्षालाई समेट्न डिजिटल प्लेटफर्मको सुरुवात गरिएको प्रधानमन्त्रीको सचिवालयले जनाएको छ। पोर्टलका माध्यमबाट देश–विदेशमा रहेका नागरिक, विषयविज्ञ र नीति निर्माताले बजेट निर्माण र विकासका प्राथमिकताका सम्बन्धमा आफ्ना राय–सुझाव पेश गर्न सक्नेछन्। जनताबाट आएका ती सुझावलाई आवश्यकता अनुसार नीति तथा कार्यक्रममा समेटिने प्रधानमन्त्री कार्यालयले जनाएको छ ।
सरकारको नीति निर्माण प्रक्रियालाई प्रशासनिक घेरामा मात्र सीमित नराखी आम जनताको भावना र विज्ञतालाई कदर गर्ने प्रधानमन्त्रीको योजना अनुरूप पोर्टल सञ्चालन गरिएको प्रधानमन्त्री कार्यालयले जनाएको छ । यो पोर्टलले नागरिक र राज्यबीचको दूरी मेटाउँदै सुशासनको नयाँ अभ्यास स्थापित गर्ने अपेक्षा प्रधानमन्त्री कार्यालयका अधिकारीहरुको छ ।
नागरिक स्तरबाट प्राप्त भएका सुझावलाई प्रशासनिक तहमा गम्भीरतापूर्वक समीक्षा गरी नीतिगत रूपमै कार्यान्वयनमा लगिने जजनाइएको छ ।
पोर्टलमा दिएका आफ्ना सुझावको पछिल्लो अवस्था र सरकारले चालेको कदमबारे पनि जानकारी लिन सकिने व्यवस्थ गरिएको छ। यसका लागि ‘सुझाव ट्रयाक’ गर्ने सुविधा पोर्टलमै राखिएको छ।
यस पहलमा सहभागी भई ‘समृद्ध नेपाल’ निर्माणको रचनात्मक योगदान दिन प्रधानमन्त्री तथा मन्त्रिपरिषद्को कार्यालयले आग्रह गरेको छ।
