काठमाडौँ । कोशी प्रदेशका मुख्यमन्त्री हिक्मत कार्कीको कार्यकक्षमा सर्वसाधारणका लागि मोबाइल लैजान प्रतिबन्ध लगाइएको छ।
कार्यकक्ष बाहिर ‘मोबाइल यता’ लेखिएको सूचना टाँसिएको छ, जहाँ मोबाइल राख्न प्लास्टिकको बकेट राखिएको छ।
मुख्यमन्त्रीका जनसम्पर्क सल्लाहकारका अनुसार मोबाइल लैजाँदा फोटो खिच्न खोज्ने कारण समय खर्च धेरै हुने भएकाले यस्तो व्यवस्था गरिएको हो। तर, सुरक्षाकर्मीहरूका अनुसार यो नियम हालै मात्र लागू गरिएको हो।
यद्यपि, यो नियम नेताहरू र कर्मचारीहरूलाई भने लागु गरिएको छैन। मंगलबार माओवादी नेताहरूले मुख्यमन्त्री कार्यकक्षमै भेट गरी छलफल र फोटो खिचेको पुष्टि गरेका छन्।
मुख्य विपक्षी दल माओवादी केन्द्रका नेताहरूले नीति तथा कार्यक्रमबारे सुझाव दिन मुख्यमन्त्रीसँग भेट गरेका थिए। नेताहरूले मोबाइल साथमै रहेको र त्यसबारे रोकटोक नभएको बताएका छन्।
यसले समान व्यवहार र पारदर्शिता सम्बन्धी प्रश्न खडा गरेको छ।
