तिहारमा विद्युत् अभाव नहुने, २४ घण्टा आपूर्ति व्यवस्थापनमा प्राधिकरण

प्रशासन पोस्ट २०८३ कार्तिक २१, शनिवार १०:५२

काठमाडौँ । नेपाल विद्युत् प्राधिकरणले तिहार तथा छठ पर्वमा विद्युत् आपूर्ति नियमित र भरपर्दो बनाउन विशेष तयारी गरेको छ । पर्वका समयमा विद्युत् अवरोध हुन नदिन उत्पादन, प्रसारण तथा वितरण प्रणालीलाई चुस्त राख्नुका साथै प्राविधिक कर्मचारीलाई २४ सै घण्टा तयारी अवस्थामा राखिएको छ ।

प्राधिकरणका कार्यकारी निर्देशक दीर्घायु कुमार श्रेष्ठले विद्युत् आपूर्तिमा समस्या आउन नदिन सम्बन्धित कार्यालय प्रमुखहरूलाई आवश्यक तयारी गर्न निर्देशन दिएका छन् । उनले प्रसारण लाइन तथा वितरण प्रणालीको निरीक्षण र मर्मतसम्भार तत्काल सम्पन्न गर्न तथा गुनासो आएमा शीघ्र सम्बोधन गर्न निर्देशन दिएका छन् ।

प्राधिकरणले लक्ष्मीपूजाका दिन विद्युत्को अधिकतम माग करिब १ हजार ७०० मेगावाट पुग्ने अनुमान गरेको छ । उक्त दिन आन्तरिक उत्पादन करिब २ हजार ५०० मेगावाट हुने प्रक्षेपण रहेकाले मागभन्दा बढी विद्युत् उपलब्ध हुने कार्यकारी निर्देशक श्रेष्ठले बताएका छन् ।