काठमाडौं
सङ्घीय मामिला तथा सामान्य प्रशासन मन्त्रालयले तर्जुमा गरिरहेको ुसङ्घीय निजामती सेवा विधेयकुको प्रारम्भिक मस्यौदामा सरोकारवालाहरूले चासो देखाएका छन् । मन्त्रालयका अनुसार मस्यौदा सार्वजनिक भएको छोटो अवधिमै हालसम्म तीन हजार पाँच सयभन्दा बढी राय, सुझाव तथा पृष्ठपोषणहरू प्राप्त भएका छन् ।
सङ्घीय शासन प्रणालीलाई सुदृढ र संस्थागत गर्ने उद्देश्यले तयार पारिएको उक्त विधेयकको मस्यौदा गत वैशाख ११ गते मन्त्रालयको वेबसाइटमा प्रकाशन गरिएको थियो । मस्यौदा सार्वजनिक भएपछि कर्मचारी, सरोकारवाला निकाय र आम नागरिकबाट उत्साहजनक रूपमा सुझावहरू प्राप्त भइरहेको मन्त्रालयले जनाएको छ ।
सुझाव संकलन र विश्लेषणका लागि कार्यसमूह गठन
प्राप्त सुझावहरूलाई व्यवस्थित रूपमा संकलन, अध्ययन तथा विश्लेषण गर्न मन्त्रालयले प्रशासन सुधार महाशाखा प्रमुखको संयोजकत्वमा एक कार्यसमूह गठन गरेको छ ।
उक्त कार्यसमूहले प्राप्त राय(सुझावहरूको औचित्य र उपयुक्तताका आधारमा मस्यौदालाई परिमार्जन गर्ने कार्य गरिरहेको मन्त्रालयले सोमबार जारी गरेको सूचनामा उल्लेख छ ।
मन्त्रालयले यो प्रारम्भिक मस्यौदा मात्र भएको र यसमा सुधारका धेरै क्षेत्रहरू रहेको स्वीकार गर्दै सरोकारवालाहरूलाई ढुक्क हुन आग्रह गरेको छ ।
