काठमाडौँ । काठमाडौँ उपत्यकामा सञ्चालन हुने सार्वजनिक यातायातलाई सुरक्षित, व्यवस्थित र यात्रुमैत्री बनाउन हालसम्म ३ हजार ३०३ सार्वजनिक सवारीसाधनमा ड्यासक्यामेरा, सिसीक्यामेरा तथा जीपीएस प्रणाली जडान गरिएको छ।
काठमाडौँ उपत्यका ट्राफिक प्रहरी कार्यालयका अनुसार सार्वजनिक सवारीमा यात्रुको सुरक्षा, सवारी व्यवस्थापन र प्रभावकारी निगरानीका लागि यी प्रविधि अनिवार्य गरिएको हो। ट्राफिक प्रहरी र यातायात व्यवस्था विभागको नियमित अनुगमनपछि यातायात व्यवसायीहरूले पनि प्रविधि जडानलाई प्राथमिकता दिएका छन्।
ट्राफिक प्रहरीका अनुसार क्यामेरा र जीपीएस प्रणालीले बढी भाडा असुली, यात्रुमाथिको दुर्व्यवहार तथा दुर्घटनासम्बन्धी विवाद नियन्त्रण गर्न सहयोग पुर्याउनेछ। आगामी दिनमा उपत्यकाभित्र सञ्चालन हुने सबै सार्वजनिक सवारीमा यस्तो प्रणाली अनिवार्य बनाउने योजना रहेको बताइएको छ।
