काठमाडौं । देशभर मनसुनी प्रणाली सक्रिय रहँदा मंगलबार बिहानैदेखि काठमाडौं उपत्यकासहित देशका विभिन्न भूभागमा वर्षा भइरहेको छ। जल तथा मौसम विज्ञान विभागले मनसुनको प्रभाव अझै कायम रहेकाले कोशी, बागमती र गण्डकी प्रदेशका केही स्थानमा भारी वर्षाको सम्भावना रहेको भन्दै आवश्यक सतर्कता अपनाउन आग्रह गरेको छ। विभागका अनुसार अहिले काठमाडौंसहित देशका विभिन्न ठाउँमा बिहानैदेखि वर्षा भइरहेको छ ।
विभागका अनुसार हाल मनसुनको न्यून चापीय रेखा आफ्नो औसत स्थानभन्दा केही उत्तरतर्फ सरेर नेपालको तराई भूभाग नजिक रहेको छ। यसका कारण देशभर सामान्यदेखि पूर्ण बदली रही अधिकांश क्षेत्रमा वर्षाको गतिविधि जारी रहने अनुमान गरिएको छ।
आज दिनभर हिमाली क्षेत्रका केही स्थानमा मध्यम वर्षासँगै हिमपातको सम्भावना रहेको छ भने पहाडी भूभागका धेरै तथा तराईका केही स्थानमा हल्कादेखि मध्यम वर्षा हुने पूर्वानुमान गरिएको छ।
यस्तै, बागमती र गण्डकी प्रदेशका तराईका धेरै स्थान तथा मधेश प्रदेशका साथै कोशी, लुम्बिनी र सुदूरपश्चिम प्रदेशका तराईका केही स्थानमा मेघगर्जन र चट्याङसहित मध्यम वर्षा हुन सक्ने विभागले जनाएको छ।
सबैभन्दा बढी सतर्कता भने कोशी, बागमती र गण्डकी प्रदेशका पहाडी तथा हिमाली क्षेत्रमा आवश्यक देखिएको छ। यी प्रदेशका एक–दुई स्थानमा भारी वर्षा हुने सम्भावना रहेको विभागले जनाएको छ। साथै बागमती र गण्डकी प्रदेशका पहाडी क्षेत्रका केही स्थानमा धेरै भारी वर्षा समेत हुन सक्ने चेतावनी दिइएको छ।
आज राति पनि देशभर सामान्यदेखि पूर्ण बदली रहनेछ। कोशी, बागमती र गण्डकी प्रदेशका हिमाली क्षेत्रका केही स्थान तथा लुम्बिनी, कर्णाली र सुदूरपश्चिमका हिमाली भूभागका एक–दुई स्थानमा मध्यम वर्षासँगै हिमपात हुने सम्भावना रहेको मौसमविद्हरूले बताएका छन्।
विभागले भारी वर्षाको सम्भावना रहेका क्षेत्रमा गेग्रान बहाव, आकस्मिक बाढी, पहिरो तथा भूक्षयको जोखिम बढ्न सक्ने भएकाले नदी तथा खोल्सानजिक बसोबास गर्ने, पहाडी सडकमा यात्रा गर्ने तथा जोखिमयुक्त क्षेत्रमा रहने सर्वसाधारणलाई विशेष सतर्कता अपनाउन आग्रह गरेको छ।
प्रतिकूल मौसमका कारण दैनिक जनजीवन, कृषि, स्वास्थ्य सेवा, पर्यटन, पर्वतारोहण तथा सडक र हवाई यातायातसमेत प्रभावित हुन सक्ने भएकाले विभागले पछिल्ला मौसमसम्बन्धी सूचना र पूर्वानुमान नियमित रूपमा अद्यावधिक गरी त्यसअनुसार आवश्यक सावधानी अपनाउन सबैमा अनुरोध गरेको छ।
